犬犬相識 若琪訪問

拍導盲犬微電影 若琪搵愛犬練戲

【on.cc東網專訊】 今日歌手若琪(Takki)、藝人謝芷倫及劉彩玉等到元朗出席微電影開鏡儀式。這部微電影與導盲犬有關,故演員與狗有不少對手戲。對於身為影壇初歌的Takki來說,可謂很大考驗,她說:「今年我同陳輝陽合作,佢同我講:『你唱咩歌呀,拍戲啦!依家寫歌搵唔到錢架!』所以我今年開始我多啲嘗試拍攝,多方面發展,當然音樂會排喺首位!(今次拍戲同狗仔有對手戲?)好大挑戰,聽講會好難控制!但我屋企有養隻北京狗,我要捉住佢同我背對白,練吓戲!希望陣間可以同隻狗有多啲默契啦!」而謝芷倫也表示認同:「我都驚佢會好難控制!不過今次會請專人訓練隻狗仔,希望拍攝時會順順利利!(有冇養過狗?)細細個有,但有一日我放學返屋企,發現唔見咗隻狗!原來係媽咪覺得我掛住同隻狗玩,所以就將佢送咗畀人!(好唔開心?)有喊架!好彩媽咪將佢送畀隔離屋,我得閒會探吓佢!」至於擔當客串角色的劉彩玉,表示今次是捱義氣答應:「因為呢間寵物公司第一個廣告係搵我嚟拍,老闆一叫到我去客串,所以我二話不說就應承!(會唔會想做女主角多過客串?)唔會,最重要件事做得好!」

REF: http://hk.on.cc/hk/bkn/cnt/entertainment/20150825/bkn-20150825143147895-0825_00862_001.html
報導時間: 2015-09-25